ኢትዮጵያ የሰብዓዊ መብት አያያዝ ሪፖርቷን በጄኔቫ ዓለም አቀፍ መድረክ አቀረበች

ኢትዮጵያ የሰብዓዊ መብት አያያዝ ሪፖርቷን በስዊዘርላንድ ጄኔቫ እየተካሄደ ባለ ዓለም አቀፍ የሰብዓዊ መብት አያያዝ ግምገማ መድረክ አቅርባለች።
በስዊዘርላንድ ጄኔቫ በመካሄድ ላይ ባለው የግምገማ መድረኩ ላይም ምክትል ጠቅላይ ዐቃቤ ህግ ዶክተር ጌዲዮን ጢሞቲዎስ ኢትዮጵያ የሰብዓዊ መብት አያያዝ ሪፖርት ዙሪያ ገለፃ አድርገዋል።
በሪፖርታቸውም በኢትዮጵያ ባለፈው አንድ ዓመት የሰብአዊ መብት አያያዝን ለማሻሻል መሰረታዊ እርምጃዎች መወሰዳቸውን አስረድተዋል።
ዶክተር ጌዲዮን በሪፖርታቸው መንግስት የወሰዳቸውን እርምጃዎች ለአብነት የጠቀሱ ሲሆን፥ ከእነዚህም ውስጥ ባለፈው አንድ ዓመት ወስጥ በፀረ ሽብር ህግ አማካኝነት ታስረው የነበሩ ጋዜጠኞች፣ ብሎገሮች እና የፖለቲካ ፓርቲ አባላት በምህረት እና በይቅርታ ከእሰር እንዲፈቱ መደረጉን አንስተዋል።
ኢትዮጵያ ከዚህ ቀደም የነበረውን የበጎ አድራጎት ድርጅቶች እና ማህበራት አዋጆች እየተሻሻሉ መሆናቸውን ያነሱት ምክትል ጠቅላይ ዐቃቤ ህጉ፥ ይህም የበጎ አድራጎት ድርጅቶች ነፃነት የሚሰጥ መሆኑን እና የሲቪክ ማህበራትም የህግ የበላይነትና ዴሞክራሲን ለማስረፅ የሚሰሩትን ስራ በተሻለ መልኩ እንዲከውኑ የሚያስችል ነው ብለዋል።
በህዝቡ ዘንድ የጋራ መግባባትና ብሄራዊ እርቅን ለመፍጠር ብሄራዊ የእርቀ ሰላም ኮሚሽን ተቋቁሞ እየተሰራበት እንደሚገኝና ይህም የማህበራዊ እና ኢኮኖሚያዊ አገልግሎቶችን ለማዳረስ ቁልፍ ሚና እንዳለው አስታውቀዋል።
የትምህርት ዘርፍን እና የአዳዲስ መንገድ ግንባታን ለሁሉም አካባቢዎች የማዳረሱ ስራ ባለፉት አስርት ዓመታት ከፍተኛ ለውጥ አሳይቷል ያሉት ዶክተር ጌዲዮን፥ ውጤታማ የሆነው የኢትዮጵያ ሴፍቲኔት መርሃ ግብርም ከአፍሪካ ግዙፉ የማህበራዊ ዋስትና ፕሮግራም መሆኑንም ጠቅሰዋል።
ኢትዮጵያ የሴቶችን እኩል ተሳታፊነት ለማረጋገጥም ውጤታማ ስራዎችን መስራቷን ያነሱት ምክትል ጠቅላይ አቃቤ ህጉ፥ ከዚህም ውስጥ ከመንግስት ካቢኔ ውስጥ 50 በመቶ ሴቶች መሆናቸውን እና በሀገሪቱ ዘመናዊ ታሪክ ውስጥ የመጀመሪያዋን ሴት ፕሬዚዳንት መሾሟንም ለአብነት አንስተዋል።
በመድረኩ እየተሳተፉ ያሉ በርካታ የተባበሩት መንግስታት ድርጅት አባል ሀገራት ኢትዮጵያ ባለፉት ዓመታት የሰብአዊ መብት አያያዝን ለማሻሻል የሰራችውን ስራዎች አድንቀዋል።
በተለይም በሀገሪቱ እየተካሄደ ባለው የፖለቲካ ሪፎርም አማካኝነት የዴሞክራሲ ምህዳሩ መስፋቱ እና ከሽብር ጋር ተያይዞ ተከሰው በእስር ላይ የነበሩ እና ተፈርዶባቸው የነበሩ የፖለቲካ ፓርቲ አባላት ከእስር እንዲወጡ መደረጉንም መልካም መሆኑን አንስተዋል።
ተሳታፊ ሀገራቱ በቀረበው ሪፖርት ላይ ኢትዮጵያ ብታሻሽል ያሉትን ምክረ ሀሳቦችም የጠቆሙ ሲሆን፥ የሞት ቅጣትን ከህጓ እንድተሰርዝ እና የእስረኞች አያያዝ ላይ አሁንም ማሻሻያዎችን ብታደረግ ብለዋል።
ኢትዮጵያ በቀጣዩ ዓመት የምታደረገው ሀገር አቀፍ ምርጫ ነፃ፣ ፍትሃዊ እና ተአማኒ ለማድረግ መስራት እንዳለባት እንዲሁም በሀይማኖት ጋር የሚያያዙ መድሎዎች እንዳይኖሩ በሀይማኖቶች መካከል ግልጽ ውይይቶች እንዲደረጉ የሚያስችሉ ስራዎችን ብትሰራም ሲሉም ገልፀዋል።
የሀገር ውስጥ ተፈናቃዎች መብት እና ጥበቃ ላይ፣ የምግብ ዋስትናን ማረጋገጥ ላይ አንዲሁም በሀገሪቱ የሚገኙ ስደተኞችን የስራ ዋስትና ማረጋገጥ እና ሀግ ወጥ የሰዎች ዝውውርን ለመካለካል የምትሰራቸውን ስራዎች እንድታጠናክርም ምክረ ሀሳብ ሰንዝረዋል።
ጎጂ ልማዶችን ለመከላከል ሀገር አቀፍ ስትራቴጂ በመንደፍ ፆታዊ ጥቃትን፣ ያለ አድሜ ጋብቻን እና የሴት ልጅ ግርዛትን ለማስቀረት የተጀመሩ ስራዎችን አጠናክራ ብትቀጥልም ብለዋል።
አለም አቀፍ የሰብዓዊ መብት አያያዝ ግምገማ መድረክ የተመድ አባል ሀገራት በአራት ዓመት ከግማሽ የሰብዓዊ መብት አያያዝን በተመለከተ የአፈፃፀም ሪፖርት የሚያቀርቡበትና የሚገመገሙበት መድረክ ነው።
ኢትዮጵያ ከዚህ ቀደም በአውሮፓውያኑ በ2009 እና በ2014 በተካሄዱት ሁለት የሰብዓዊ መብት አያያዝ ግምገማ መድረኮች መሳተፏ ይታወሳል።
በሙለታ መንገሻ